Bai astelehen ederra izan dela gaurkoa! Ikastetxera iritsi orduko euskal musika izan dugu gure belarrien gozamenerako.
Eta hantxe zegoen sarreran kartel ikusgarri bat zer egun genuen gogorarazteko:
“ EUSKARAREN EGUNA
EUSKARAZ BIZI ETA GOZATU”
Gaurko “Egun onak” ere desberdinak izan dira. DBHko Hizkuntza Ikasle Batzordeko kideen eskutik etorri zaizkigu egun berezi honen garrantzi eta jatorriaren azalpenak.
Goiza berotzeko, LHkoek bertso zein baino zein ederragoak abestu dituzte. Ondoren, “Ikurrinaren dantza” eta “Aurreskua” eskaini dizkigute, kalejira eder batekin agurtu gaituztelarik. Hau guztia, nola ez, txistu eta atabalen laguntza dotoreaz. Azkenik, goizeko ekitaldi hau borobiltzeko, lehenengo zikloko ikasleek “Euskaldunak gara” kanta abestu dute maisuki.
Eguerdian ekintza hauek errepikatu egin dira. Oraingo honetan ere, “Euskal Herrian euskaraz” abestia entzunez hasi da saioa eta ikasleei aurkezpena egin eta gero, bertsoak , euskal dantzak eta abestiak izan ditugu. “ Euskaldunak gara” kanta HHko ikasleen eskutik etorri da, denok txunditurik utzi gaituztelarik; a zer nolako martxa duten txiki hauek!!!
Goizean zehar LHkoak euskararekin lotura duten kartelak egiten aritu dira. Benetan gauza politak egin dituzte eta goiza amaitu baino lehen maila bakoitzean saridun bat izan da. 6. mailakoak eta DBHkoak ere lanean aritu dira Lehendabizi, euskararen erabilerari buruz hausnarketa bat egin dute eta ondoren euskarari piropo bat asmatu behar izan diote. Hauen orijinaltasuna ere saritua izan da. Kartel hauek eta piropo hauek ikusgai jarriko ditugu frogak.floreaga.eus-en ondorengo egunetan, goizean zehar abestu diren bertsoekin batera.
Amaitzeko esan, DBHn lehiaketa bat egiten aritu garela aurreko pare bat asteetan. Ikasleek Ginkana honen bidez, euskal munduarekin lotutako hainbat pertsona lotu behar izan dituzte beraien ofizio edo zaletasunarekin. Esaera zaharrak ere amaitu beharra izan dute. Eta azkenik, Euskal Herriko hainbat herri bertako zazpi probintzietan kokatzea tokatu zaie. Parte hartzaileen artean zozketa egin dugu eta sari banaketa gaur bertan izan da.
Hitzak: Amaia Alberdi
Utzi erantzuna