Maiatzaren 21a egun berezia izan zen 5 eta 6. mailako ikasleentzat. Ikasturtean zehar Bertsozale Elkarteak sortutako eta Udalak babestutako “Gu ere bertsolari” proiektuan parte hartu dute ikasle hauek eta maiatzaren 21ean Baztartxo Antzokian emanaldi paregabea eskaini zuten Xabier Munibeko ikasleekin batera.
Ikasturte osoan zehar landutakoaren emaitza izan zen han ikusitakoa. Gai ezberdinen inguruan aritu ziren: gaiak aukeratu, arrazoiak bilatu, bertsoa osatu eta behin eta berriz entseatu, mozorroak prestatu… Lan mardula izan da ikasleek azken bi hilabetetan egindakoa.
5. mailan batzuk ipuin klasikoentzat amaiera ezberdinak asmatu zituzten, beste batzuk Barre hiztegi modura aritu ziren, bila zebiltzan ikasleei erantzun xelebreak emanez. 6. mailan talde batek zinearen munduan murgildu gintuen pelikula ezagun batzuen berri emanez eta beste taldeak berriz Euskal Herriaren argazkia osatu ziguten, herri kirolarien, pertsonaia mitologikoen, inauterietako pertsonaien eta bertsolarien eskutik.
Emanaldiaren ondoren jasotako zorion hitzek gozatu zituzten gure belarriak eta egia esan gure ikasleek publikoki zoriontzeko eta txalotzeko moduko jarrera izan zuten, bai eszenatoki gainean eta baita entzule modura ere.
Berriro ere hizkuntzarekin jolasteko eta gozatzeko aukera izan genuen eta Jokinek berak onartu zigun bezala aurten ere oso ondo bete ditugu proiektuaren helburu guztiak.
Hitzak: Mailu Irizar
Argazkiak: Laura Murillo
Utzi erantzuna