Ekainaren 3a iritsi zen, gure txikitxoentzat hainbeste desiratutako eguna.
Umeen artean irrifarrak, urduritasuna eta egonezina antzeman zitekeen.
Autobusa hartu eta lehenengo Oriora joan ginen. Ailegatu eta parkean jolasteko aukera izan zuten eta indarrak berritzeko bapo-bapo bazkaldu genuen bakoitzak etxetik eramandakoa. Goiza bukatzeko, urtero bezala inguruko animaliak ikusiz ibilaldi txiki bat egin genuen.
Arratsaldean Txiki Parkera joan ginen, aukera paregabea izan zuten hango txirrista, malda eta bolatxoekin gozatzeko, nahiz eta leher eginda bukatu.
Azkenik, etxera itzultzeko berriro autobusa hartu genuen eta gehienak lokartu egin ziren, abentura handiko eguna igaro ostean ohikoa den bezala. Irteera honetan izugarri ondo pasa zuten haurrek, egun ahaztezina izan zen beraientzat eta datorren urtean berriro errepikatzeko prest daude.
Hitzak eta argazkiak: HHko irakasleak
Utzi erantzuna