ZAPOREAK

Don Bosco Kultur Astean, ZAPOREAK taldeko Oraitz Garzia donostiarra izan dugu Floreagan urtarrilaren 26an.

Gobernuz Kanpoko erakunde hau, ZAPOREAK, Donostian, Intxaurrondon, sukaldean trebeak diren koadrila bateko lagunek osatu zuten 2015ean, Siriako gerratik Europara zetozen errefuxiatuei jaten duintasunez emateko asmoz.  Kios irlara lehen bidaia 2016ko urtarrilean egin eta martxoan jada bazkariak ematen hasi ziren. Orain egunean 1200-1400 bazkari banatzen dituzte eta denbora tarte labur honetan 250 boluntario inguru joan dira Kios aldera, euren oporretako hiru aste musutruk emateko asmoz.

Turkiatik Kiosera erraz sartzen ziren errefuxiatuak hasieran, eta han egun gutxi egin ondoren, Greziako hiriburura eta handik Europako hainbat herrialdera abiatzen ziren; orduan janaria poteetan ematen zitzaien. Gero Turkiak eta Europar Batasunak sinatu zuen akordioak kontrola asko estutu zuen eta errefuxiatu asko denbora luzez Kios irlan daude; orduan janaria bandexetan ematen zaie. Pixkanaka, euskal sukaldaritzaz gain, siriarren gustuko jaki batzuk euren erara prestatzen ere hasi dira. Orain 1500 kaloriako menuak eskaintzen dituzte. Kanpin dendetan errefuxiatuak hotz handiak pasatzen ari dira orain.

Eraso bat ere izan zuten, sukaldea apurtu zietenean; baina aurrera jarraitu dute lanean.

Oraitzek oso garbi hitz egin zigun errefuxiatuen eta proiektu honen egoerari buruz. Gainera bost bideo labur erabili zituen, bere azalpenak hobeto ulertzen laguntzeko.

Oraitzek errefuxiatuen eskerrona azpimarratu zuen. Askotan esaten diete oso goxo sukaldatzen dutela janaria. Gainera Donostian, Gipuzkoan eta Euskal Herrian jendearengandik jasotzen duten laguntza eskertu zuen. Enpresa batzuk eta erakunde publikoek ere ematen dute laguntza. Irailean Koxk jaialdia antolatzen dute: sukaldari eta taberna ugarik eskaintzen dituzte pintxoak eta biltzen dirua proiekturako bideratzen da; gastuak handiak baitira.

Oraitzek komentatu digu guk ere izan ditzakegula gure ametsak, edota gure ideiak besteei laguntzeko. Merezi duela aurrera egitea. Mila esker, Oraitz eta ZAPOREAK!!

Hitzak eta argazkiak: Juan Inazio Sudupe