NIK HIRI ETA HIK NIRI, EMAN HAUSPOA EUSKARARI!

Euskarak 365 egun baditu ere, hori gogorarazteko egun berezi bat izan ohi dugu: abenduaren 3a.

Aurtengoan “Nik hiri eta hik niri, eman hauspoa euskarari” lelopean ospatu dugu. Haurtzaindegiko txikienekin hasita kate erraldoi bat osatu dugu, patio berdean, ikastetxeko ikasle eta irakasle guztion artean. Geure argazkiak eta hainbat irudi eta emotikono itsatsi ditugu hizkuntzaren transmisioan garrantzitsuak direnak: etxea, eskola, musika, liburuak, aldizkariak, teknologia berriak…Hau guztia egin aurretik, ordea, LH eta DBHkoak aurkezpenak egiten aritu dira euskara eta euskal kultura ardatz izan dituztelarik.

“Nik hiri eta hik niri” emate horretan, mezuen trukaketa ere izan dugu. LH5etik DBH4ra arteko ikasleek, duela aste batzuk, mezu batzuk idatzi zituzten beste ikastetxeetako ikasleentzat. Mezu horretan beraientzat euskara zer den adierazi behar zuten. Gaur horietako mezu batzuk irakurri ditugu eta behin eta berriz errepikatu den ideia honako hau izan da: “gure arbasoengandik jasotako altxor bat da, gu geu garen bezalakoak egiten gaituena…” Beste ikastetxeetako ikasleek bidalitako gutunak ere jaso dituzte.

Txikiagoek, aldiz, mezuak globo batzuen barruan sartu dituzte. Gustura joan dira plazara, globoekin saltoka eta kantuan trikitixa doinuan. Plazako ekitaldiaren amaieran, globoak airean ibili ondoren, puskatu eta barruko mezuak aurkitu behar zituzten.

Hori guztia goizean izan da, baina arratsaldean ere festarekin jarraitu dugu. Txikienak On Bosco aretoan bildu dira eta makina bat asmakizun, abesti, olerki eta dantzaz gozatzeko aukera izan dute. Amaitzeko, LH6koen eskutik bertsoak izan dituzte eta txistu eta atabalen laguntzaz dantzari bikainak.