Pandemia dela eta ezarritako neurrien ondorioz, askok hartu dugu denbora librea mendian pasatzeko ohitura. Baina jartzen al dugu arreta inguruan ditugun landareetan? Ezagutzen al ditugu etxetik pauso batera ditugun zuhaitzak?
Helburu horiek lantzeko asmotan hasi gara BASOAK ERNATZEN proiektuarekin. Haritzaren ezkurretik abiatuz, bertako basoa biziberritzen lagundu nahi dugu. Bide batez, inguruko basoen ezagutza zabaltzea espero dugu.
Azken asteetan LH 5 eta DBH 4koek ezkurrak ernatzeko lehen pausoak eman ditugu, maila bakoitzak metodo desberdina erabiliz.
LH 5ekoek, zuzenean lurrean erein genituen ezkurrak. Horretarako, lehenengo baratza txukundu genuen, belar txarrak kenduz eta lur goxoarekin aberastuz. Ondoren, bakoitzak bere ezkurra jarri genuen ernatzen.
DBH 4ko ibilbide aplikatuko ikasleek berriz, erretilu batean sukaldeko paperarekin estaliz egin genuen proba. Orain, papera bustita mantentzeaz arduratu beharko dugu datozen egunetan. Ernetzen hasten direnean baratzera pasako ditugu.
Hurrengo aste eta hilabeteetan, ezkurren jarraipena egingo dugu talde: sustraia eta zurtoina antzematen zaien, hostoak atera zaizkien, zenbateko altuera duten…
Amaitzeko, udaberrian ondo ateratako landareak Gipuzkoako Foru Aldundiaren mintegi batera eramatea da asmoa. Beraiek, landare sendoagoak itzuliko dizkigute, herriko lursail batean landa ditzagun.
Guk bertako basoen alde gure aletxoa jarri dugu, eta zuk?
Utzi erantzuna